Ֆրանչիսկոս Սրբազան Քահանայապետին 31 յունուարի արտասանած Քարոզը` ''Չկորսնցնել մեղքին իմաստը''։

Ուրբաթ, 31 յունուարին, առաւօտեան, Ֆրանչիսկոս Սրբազան Քահանայապետը , Տոմուս Սանթա Մարթայի մատրան մէջ մատուցած սուրբ պատարագի ընթացքին, որուն մասնակցեցաւ նաեւ Աւստրալիոյ Հայ Կաթողիկէ համայնքի հովիւ՝ Հայր Բարսեղ Վրդ. Սուսանիան, Նորին Սրբութիւնը արտասանած իր քարոզին մէջ ըսաւ.
''Բոլորս մեղաւորներ ենք, եւ բոլորս փորձութիւններու ենթակայ ենք, իսկ, եթէ մեզմէ մէկը ըսէ թէ` ''երբեք փորձութիւններու ենթակայ չեմ'', Քահանայապետը հաստատեց թէ` ''կամ գերմարդկային է կամ ալ՝ տխմար''։
Բնական է - աւելցուց Նորին Սրբութիւնը - պայքար մղել կեանքին մէջ, որովհետեւ սատանան երբեք հանդարտ չի կենար ու կ՛ուզէ միշտ՝ յաղթական ըլլալ։
Ամէն օր արտասանելով ''Հայր Մեր'' աղօթքը, շարունակեց Քահանայապետը, մենք, Աստուծմէ կը խնդրենք ''Թող գայ Քու Արքայութիւնդ, այսինքն ''Թող աճի Քու Արքայութիւնդ''։ Իսկ, երբ որ մեղքին իմաստը կը կորսուի, Աստուծոյ Արքայութեան իմաստն ալ կը կորսուի ու անոր տեղը կը յառաջանայ ''մարդաբանական զօրաւոր տեսողութիւն'' մը որուն համար ''ես ամէն բանի կարող եմ'' եւ պէտք չ՛ունիմ Աստուծոյ։
Ասոր համար, ամէն օր աղօթելու ենք ''թող գայ Արքայութիւնդ'', որովհետեւ փրկութիւնը մեր խելացիութեամբ եւ ճարպիկութեամբ ձեռք չի բերուիր այլ՝ ան կարելի է, միայն՝ Աստուծոյ շնորհքով։
Ժամանակակից ամենամեծ մեղքը` մեղքին իմաստը կորսնցնելն է'' ըսաւ Ֆրանչիսկոս Պապը ։
Ֆրանչիսկոս Քահանայապետը երզրափակեց իր արտասանած քարոզը, հրաւիրելով՝ ''աղօթել Տիրոջ, Անորմէ խնդրելով շնորհքը՝ չկորսնցնելու համար մեղքին իմաստը ։